Folka eta soinu akustikoa elektronikarekin uztartzen ditu Eneritz Furyak musikari irundarrak Emadan bere azken disko luzean: argi-ilunezko unibertso horretan, melodiak letra abstraktu eta poetikoekin batera bizi dira, galdera zerrenda amaigabea proposatuz entzuleari. Disko bera oholtza gainera eramatean, musikaria bera da elementu guztien arduraduna: gitarra, ahotsa eta pedalekin jotako sintetizadoreari Furyakek berak sortutako irudien proiekzioak batzen zaizkio.

 

Azken urteetan Eneritz bere alderik esperimentalena ere garatzen jardun da musikari nahiz soinu teknikari gisa: ‘Bi arnas’ dokumentalaren soinu banda ekoizteaz gain, 2022an Nazioarteko Trikitixa Jaialdian aritu zen berariaz festibalerako sortutako noise proposamen batekin. 2023tik Paisaiak izeneko proiektuan murgilduta dabil: atzerrian egindako bost artista-egonalditan sortutako pieza audiobisualen bilduma osatzen  aritu da, lekuan lekuko gai, iruditeria eta soinuei lotuta.